Baguio
Isang salita na marahil ay may sari-sariling depinisyon o kahulugan para sa bawat isa sa atin. Isa ka mang Baguio Boy, Baguio Girl, Taraki, Igorot, Taga-Baba, Estyudante, Dayo o Turista bawat isa may kanya kanyang kahulugan sa isang salitang ito.
Baguio.
Bahay. Tahanan. Balay. Bag-iw. Ngarud. Anya. Ngay. Bundok. Pahinga. Bakayson. Malamig. Mahal. Pines. Puno. Momah. Pinikpikan. Strawberry. Panagbenga. Burnham. Kabayo. Cowboy. Country. Ay. Isu. Louisian. UBian. UCian. PMAer. Tiongsan. Nightmarket. Sunflower.
Sa nakalipas na mga taon ang ating mga puno at bundok ay unti-unting napalitan ng semento at bato. Ang amoy ng mga puno tuwing paakyat ka rito ay napalitan ng usok ng makina ng mga sasakyang di na mabilang. Ang mga tanawing nag gagandahan ay dumudumi at unti-unti nang nagsisiwalaan.
Baguio.
Semento. Trapik. Basura. Dumi. Ingay. Gulo. Wasak. Kinalbo. Inubos. Ginahasa. Nasira. Kalsada. Condominium. Hotel. Bato.
Maraming pagkakataon makababa ng bundok. Maraming beses na pwede nang lumipad sa ibang bansa.
Pero…
Nananaig ang nais na manatili. Nangingibabaw ang nais maiangat ang siyudad na binigyan ng maraming kahulugan sa mga nakalipas na taon. Walang masama sa pag asenso at pagiging progresibo. Ngunit hanggang saan tayo titigil at makukuntento. Kailan magkakaroon ng limitasyon ang pag asenso at pag-aaruga? Kailan dadating ang araw na mas importante ang nakakarami sa bulsa ng kakaunti?
Hindi kami aktibista. Hindi kami tutol sa pag-unlad. Hindi kami tutol sa SM o kung ano mang mga developer. At hinding-hindi din kami mga bayani.
Mga taga-Baguio lang kami na gustong masilayan din ng aming mga anak at susunod ng henerasyon ang siyudad kung saan kami lumaki. Marahil pag nakita nila ang aming nakita ay maintindihan nila kung bakit kami nanatili.
Isang salita.
Baguio. Mahal. Namin.
(English Version to be posted soon)